ao 74 den 7 juny 
Philip plewe Scholz zur Grunen Linde, beschweret sich vber hans Quosen das ey er Jhme eynem manne so zur Grunen Linde wonet eyn erlich vihe mit gewalt genommen. – 10 R... Ist darauff den 9 ... Juny An Tapiau geshriben Durchleuchtigister hochgeborener Fürst Gnedig=ster her E Fl dl. sind meine vnderthenige gevliessene dinste ieder zeit hochstes vleisses Zunorn Gnedigster Fürst und her E Fl dl. sol ihn vnderthenigkeit ich nicht bergen/ das kurtz vor wichener Zeit ein man mit nahmen Bartolome=us zu mir gekommen/ mit bitten vnd begeren/ ich wolde ihme doch ihn E Fl dl dorffe grune=linde genant/ ahn stadt vnd von wegen E Fl dl ein par huben/ weil derselben etliche wuste/ vor=leihen vnd geben/ darauf ich den mich bey demsel=ben manne erkundiget/ von wannen ehr kome/ ob ehr auch iergends einem Edelmanne mit leibeigen=schaft verhafftet/ da ehr mir dan angezeigt/ das ehr weiland under E Fl dl gewonet/ entlichen aber durch gutte worte von Quosen vberreidett E Fl dl Huben besetzet/ vnd vnder den Quosen Smich begeben/ aber weder vor Smich nach Smeine kinder demselben Quosen manschaft gelobt vnd zugesagtt Weil aber der Alde Junker mit tode abgangen/ und sein Sohn an seiner stad sich des regiments vnderfangen/ hat ehr den armen man die zeit hehr harte geengstett vnd gedrenget also das ehr solche harte schwere dienstbarkeit nicht lenger ausstehen konnen/ ist dersalben aus nott gezwungen worden/ sich von ihme zuentbrechen vnd ahn andere Orte Zu wenden. Weil ihnen aber Got durch seine schwere arbeit ein wenig gesegnet/ vnd ehr vber die volle besatzunge ein wenig viehe gehabt/ vnd dasselbe mitgenhomen. H...ls hatt ihme Hans Quos zu Keutern dasselbe viehe so ehr vber die besatzung gehabt mit gewalt aus vnserem dorf grunelinde weggetrieben/ vnan=gesehen das ehr ihme vf seinem erbe an viehe vferden saat vnd gebeuden vnd dergleichen mehr gelassen als ehr ihme vberantwortett/ da ehr vnder ihme gezogen. Demenach aber Gnedigster Fürst vnd her derselbe man mit keinem recht vnd billigkeit zur leibeigenschaft weil ehr vnder ihme nicht Jung worden/ auch keine manschaft gelobt kan gezwunger werden/ vnd billich iedem damit ihnen Got gesegnet dasselbe zugonnen. Derwegen ahn E Fl dl mein vntertheniges bitten E Fl dl wollen den armen man wider solche gewalt des Quosen schutzen/ vnd dem Quosen mit ernste befehlen das ehr ihme sein viehe/ so ehr ihme zur grunelinde genohmen zusampt seinen kindern so ehr ihme hin vnd wider vorschenckett wiederumb zustelle/ damit E Fl dl huben der man be=treiben/ vnd wiederumb/ weil sie gar verwustett zu gange bringen moge. Zweifel nicht E Fl dl als der Gnedigste Christlichste Landsfürst des armen mannes not beherzigen vnd ihme zu dem seinigen vorhelfen werden Solchs wird got der Allemechtige E Fl dl zu zeitlicher vnd ewiger wolfart reichlich belohnen. 
E FL dl. Vnderthenigster 
Philip Plewe Schultz zu Grunelinde